МВР сè уште води полициски евиденции во тефтери, Тошковски најавува дигитализација за три до четири месеци

Министерството за внатрешни работи сè уште користи рачни евиденции за документирање на полициските настани, а преминот кон дигитално внесување и обработка на податоците се очекува во наредните три до четири месеци. Ова го најави министерот за внатрешни работи Панче Тошковски на денешниот брифинг со новинарите.

— реклама —

Тој посочи дека во моментов полициските службеници користат 36 евиденции, односно книги, иако претходно нивниот број достигнувал околу 70. Според него, ваквиот начин на работа е несоодветен за 2026 година, бидејќи истите податоци за едно лице често мора да се внесуваат повеќепати во различни книги, во зависност од видот на пријавениот настан.

Тошковски преку пример објасни дека при пријавување кривично дело, доколку случајот опфаќа семејно насилство, телесна повреда, присуство на малолетници и други околности, службениците мора да отвораат повеќе различни евиденции и повторно да ги запишуваат личните податоци.

— реклама —

„Е тоа е 2026 година, 11. месец. Реално тоа. Во моментот имаме 36 евиденции (книги), а претходно беа 70-ина евиденции“, изјави министерот.

— реклама —

Тој додаде дека при преземањето на функцијата затекнал систем во кој податоците се чувале во архивски ормани, а службениците морале рачно да ги пребаруваат книгите кога им биле потребни одредени информации.

Според Тошковски, процесот на дигитализација трае две години и два месеца и е во завршна фаза. Со новиот систем, полициските службеници ќе можат електронски да ги внесуваат и обработуваат податоците, без повторување на истите записи во повеќе евиденции.

— реклама —

„За кратко, за три-четири месеци најмногу, се надевам и побргу, ќе видиме до кај стигнало Министерството за внатрешни работи во 2027 година“, рече Тошковски, најавувајќи видлив напредок и модернизација на системот во наредниот период.