Министри, директори, функционери и црковни лица казнети од „Безбеден град“: Тошковски тврди дека сите ги платиле казните

И функционери од различни нивоа, министри, директори и црковни лица се нашле меѓу казнетите за сообраќајни прекршоци регистрирани од камерите на системот „Безбеден град“. Според министерот за внатрешни работи Панче Тошковски, казни добивале и лица што управувале со службени и приватни возила, а сите изречени казни биле платени.

— реклама —

На прес-конференција посветена на резултатите од проектот, Тошковски откри дека во минатото имало обиди за ургирање за сообраќајни прекршоци, но тврди дека тие престанале по неговата реакција.

— реклама —

Тој рече дека речиси и да нема функционер кој не му потврдил дека добил казна и ја платил, додавајќи дека во последната година и половина немало барања за интервенции поврзани со конкретни прекршоци.

— реклама —

„Претходно да, во рамките на техничка влада имав одредени ургенции за одредени прекршоци. По мојата бурна реакција, последнава година и половина не се случило некој да побара од мене што било поврзано со ургирање во врска со конкретен сообраќаен прекршок“, изјави Тошковски.

— реклама —

На прес-конференцијата новинарите поставуваа прашања исклучиво за системот „Безбеден град“, кој неодамна започна со работа. Министерот оцени дека примената на системот придонела за намалување на бројот на загинати во сообраќајни несреќи за 30 проценти.