Од денес околу 40 камери на „Безбеден град“ ќе следат сообраќајни прекршоци во Охрид, Струга, Кичево и Дебар

Системот „Безбеден град“ од денеска е активен и на подрачјето на СВР Охрид, каде што со околу 40 камери ќе се следи сообраќајот во повеќе општини и на клучни патни делници во југозападниот дел на Македонија.

— реклама —

Видеонадзорот ги опфаќа Охрид, Струга, Кичево, Дебарца и Дебар, како и патните правци кон Струга, Дебар и граничниот премин Ќафасан. Камери се поставени и кон туристичките населби, плажите, Свети Наум и на автопатската делница Охрид – Кичево, објави 4news.mk.

— реклама —

Системот ќе регистрира сообраќајни прекршоци, меѓу кои пречекорување на брзината, непрописно паркирање и минување на црвено светло. Од СВР Охрид очекуваат неговото воведување да придонесе за намалување на прекршоците и сообраќајните несреќи.

Портпаролот на СВР Охрид, Стефан Димовски, упати апел до возачите да ги почитуваат сообраќајните правила и ограничувањата на брзината, нагласувајќи дека системот треба да се сфати како партнер во зголемувањето на безбедноста, а не само како средство за казнување.

— реклама —

„Апелирам до возачите на патничките и други моторни возила да се придржуваат, да ги почитуваат ограничувањата на дозволената брзина и, се разбира, „Безбеден град“ да го сфатат како еден партнер во делот на зголемена сообраќајна безбедност“, изјави Димовски.

Со проширувањето на системот во охридскиот регион се очекува подобра контрола на сообраќајот, особено на фреквентните патишта и во туристичките подрачја.