Македонија се соочува со нов топлотен бран, а поради екстремно високите температури земјата е во портокалова фаза на опасност. Во делови од земјата температурите деновиве се приближуваат до 40 степени, што веќе се одразува и врз работата на итната медицинска помош.
Во Штип, бројот на интервенции на Итната медицинска помош е зголемен за околу 60 проценти. Најчести се случаите на колапс и кардиоваскуларни компликации, поради што здравствените работници апелираат граѓаните да бидат особено внимателни во најтоплиот дел од денот.
Хронично болните треба редовно да ја земаат пропишаната терапија, а при појава на симптоми на топлотен удар или топлотна исцрпеност веднаш да побараат медицинска помош.
Високите температури ја зголемија и потрошувачката на вода. Од ЈП „Исар“ – Штип информираат дека просечната потрошувачка во овој период е околу 185 литри во секунда, односно приближно 16.000 кубни метри дневно. Во попладневните часови потрошувачката достигнува и до 260 литри во секунда.
Од претпријатието уверуваат дека имаат доволен капацитет за непрекинато водоснабдување, но апелираат до граѓаните рационално да ја користат водата за пиење.
Според прогнозите, топлотниот бран ќе продолжи и во наредните денови. Температурите на места ќе достигнуваат до 40 степени, а во попладневните часови, особено во одредени делови од земјата, ќе има услови за локални поројни врнежи и грмежи.
При портокалова фаза се препорачува избегнување директно изложување на сонце и активности на отворено во периодот од 11 до 17 часот. Се советува носење лесна и светла облека, почести одмори во сенка и редовно внесување течности.
Разладувањето на просториите и доволниот внес на вода во вакви услови не се само прашање на комфор, туку се важен дел од заштитата на здравјето.
