Македонка ја истрча Сахара: Јасмина Јордева со десет национални рекорди и над 70 маратони зад себе

Македонката Јасмина Јордева испиша нова страница во својата спортска приказна, станувајќи, според доставените информации, првата Македонка што истрчала ултрамаратон низ пустината Сахара. Зад овој подвиг стојат години тренинзи, десетици маратони и ултрамаратони и десет национални рекорди во различни дисциплини и возрасни категории.

Јордева веќе три децении живее и работи во Италија, во близина на Милано. Нејзината љубов кон трчањето започнала во 2018 година, кога случајно се приклучила на локалната тркачка група „Tim Possible“. Тогаш открила дека најмногу ѝ одговараат долгите дистанци.

— реклама —

Нејзината прва трка била полумаратон, но само една година подоцна веќе се соочила со многу поголем предизвик – ултрамаратон од 100 километри на Алпите.

— реклама —

Во 2020 година учествувала на Европското првенство во трчање на 24 часа, каде што го освоила 17. место. Следната година ја започнала со четири новогодишни маратони во италијанскиот град Форте деи Марми, по што следувале уште десетина ултрамаратонски натпревари во дисциплините од шест, 12 и 24 часа.

За седум години активно трчање, Јордева има завршено повеќе од 70 маратони и ултрамаратони, а во 2026 година учествувала и на Светското првенство во трчање на 24 часа.

— реклама —

Иако се занимава со ултрамаратонско трчање рекреативно, нејзините резултати ја издвојуваат во македонската статистика. Според податоците од германската база за ултрамаратонски резултати DUV, Јордева има десет национални рекорди во возрасните категории над 40 и над 45 години.

Рекордите се во пет дисциплини – 50 и 100 километри, како и временските ултрамаратони од 12, 24 и 48 часа.

Од првиот полумаратон во 2018 година до ултрамаратонот низ Сахара, Јордева изградила спортска кариера со настапи на европски и светски натпреварувања, покажувајќи дека и рекреативното трчање може да донесе значајни спортски резултати.