Македонската таеквондистка Миљана Рељиќ освои бронзен медал на Отвореното светско првенство Г-4 во Таијуан, Кина, со што продолжи со успешните настапи на меѓународната сцена.
Рељиќ настапи во категоријата до 62 килограми, во конкуренција на 43 таеквондистки, а до медалот стигна со три победи.
На стартот таа убедливо со 2-0 ја совлада домашната натпреварувачка Јијао Санг. Во следната борба беше подобра од Узбекистанката Мохидил Уктамјонова со 2-1, додека пласманот на пиедесталот го обезбеди со уште една победа од 2-1, овојпат против претставничката на Тајпеј, Чиа Веи Ванг.
Бронзата од Таијуан носи и значајни бодови за Рељиќ во борбата за што подобар пласман на олимписката ранг-листа и обезбедување настап на Олимписките игри во Лос Анџелес во 2028 година.
