Македонски државјанин уапсен во Загреб: 15-годишно девојче пријавило сексуално злоставување во авион

Уапсен е 66-годишен македонски државјанин на аеродромот „Фрањо Туѓман“ во Загреб веднаш по слетувањето, откако 15-годишно девојче кое патувало само пријавило дека се плаши од патникот што седел до неа.

— реклама —

Според хрватските медиуми, инцидентот бил пријавен додека авионот бил во лет. Малолетничката ѝ се обратила на стјуардеса и преку порака на телефонот побарала помош, наведувајќи дека се чувствува загрозено од 66-годишниот патник.

Членката на кабинскиот екипаж веднаш реагирала и, под изговор дека ќе ѝ покаже на девојката каде се наоѓа тоалетот, ја одвела во пилотската кабина, со што ја оддалечила од осомничениот.

— реклама —

Во пријавата, според наводите на медиумите, девојчето кажало дека мажот наводно почнал да ја допира по интимните делови од телото за време на подготовките за полетување, тврдејќи дека ѝ помага да го врзе сигурносниот појас.

— реклама —

За случајот бил информиран и останатиот дел од екипажот, кој ја известил контролата на летање. По слетувањето во Загреб, полицијата го пречекала 66-годишникот и го лишила од слобода, со што било спречено неговото понатамошно патување.

По спроведената истрага, осомничениот бил предаден на надлежното Општинско државно обвинителство, а потоа бил изведен пред суд. Судот му одредил притвор во затворот во Реметинец.

Станува збор за сомнение за сексуално злоставување, а за вината на осомничениот ќе одлучува судот.