Македонскиот рубин ќе биде во фокусот на новите активности за негова заштита, сертификација и промоција, кои Министерството за енергетика, рударство и минерални суровини ќе ги претстави во понеделник, 21 септември.
На настанот ќе бидат презентирани досегашните резултати, како и следните чекори за воспоставување систем со кој ќе се гарантираат потеклото, квалитетот и препознатливоста на македонскиот рубин.
Планирано е да се утврди и документира потеклото на рубинот, да се воведат сертификати и јасни стандарди, како и да се воспостави регистар на овластени производители и обработувачи. Дел од активностите ќе бидат насочени и кон автентична промоција на рубинот во земјава и на странските пазари.
Јавноста ќе биде информирана за досега реализираните активности, идните чекори и начинот на кој ќе се спроведува процесот во наредниот период.
На настанот ќе присуствуваат министерката за енергетика, рударство и минерални суровини Сања Божиновска, членовите на новоформираната Комисија за македонскиот рубин, како и претставници на Геолошкиот завод, Државниот завод за индустриска сопственост и други институции вклучени во процесот.
Божиновска во јуни соопшти дека македонскиот рубин е официјално заштитен како национален полускапоцен камен. Институционалниот процес за негова заштита започна во септември 2025 година.
Македонскиот рубин е вид корунд со карактеристична малиново-розова боја, која се должи на присуството на хром во неговата кристална структура. Наоѓалишта има во околината на Прилеп и во планинските предели на Мариово.
Според Министерството, македонскиот рубин е единствениот рубин во Европа што природно се вади и обработува, поради што институциите настојуваат да добие поголема меѓународна препознатливост и соодветно економско вреднување.
Покрај естетската и колекционерската вредност, надлежните го издвојуваат и како дел од природното и културното наследство на Македонија.
