Македонскиот рубин добива институционална заштита и сертификат за потекло, квалитет и посебни својства, со цел да се воспостават јасни стандарди и производот да се препознае како национален бренд.
Министерката за енергетика, Сања Божиновска, денеска информираше дека за македонскиот рубин ќе биде изработен и QR-код преку кој купувачите ќе можат да ги добијат информациите содржани во сертификатот. Првиот код се очекува да биде изготвен до крајот на октомври.
Според Божиновска, називот „македонски рубин“ ќе може да се користи само за производи за кои е потврдено потеклото, постои соодветна документација, извршена е стручна контрола и се исполнети критериумите утврдени со елаборатот, правилникот и законската рамка.
Целта е да се воспостави систем со кој ќе се следи материјалот од неговото потекло, преку обработката, па сè до означувањето, продажбата и промоцијата. На тој начин, како што посочи министерката, треба да се заштитат производителите, обработувачите и занаетчиите кои ги почитуваат правилата, но и купувачите да имаат сигурност дека производот навистина има автентично потекло и проверен квалитет.
Институционалната заштита на македонскиот рубин како географска ознака започна во 2025 година, кога Министерството за енергетика, рударство и минерални суровини, во координација со Геолошкиот завод, ја започна иницијативата за правна заштита.
Геолошкиот завод го изработи елаборатот со податоци за потеклото и специфичните својства на рубинот, по што во мај годинава беше поднесена пријава до Државниот завод за индустриска сопственост. На 17 јуни било донесено решение со кое географскиот назив „македонски рубин“ доби правна заштита.
Божиновска оцени дека со тоа е создадена основа македонскиот рубин да се развива како препознатлив производ, со потенцијал за нови економски можности за занаетчиите, дизајнерите, обработувачите, трговците и локалните заедници.
