Македонските пилоти забележаа голем успех на меѓународниот натпревар со едрилици „Бланик куп“ во Босна и Херцеговина, каде што Раде и Марјан Ивановски од Штип го освоија првото место во екипна конкуренција.
Таткото и синот Ивановски настапуваа за воздухопловниот клуб „Римин ер“, а до победата стигнаа во конкуренција на триесет искусни натпреварувачи од регионот и Европа.
Раде и Марјан со години се занимаваат со воздухопловство и спортско летање, а своето искуство го градат и на спортскиот аеродром Сушево кај Штип.
Македонија забележа одличен резултат и во поединечната конкуренција.
Кумановецот Ненад Давидовиќ го освои првото место на Отвореното првенство, со што македонските пилоти се најдоа на врвот и во екипното и во индивидуалното натпреварување.
Успехот на Ивановски и Давидовиќ претставува уште еден значаен резултат за македонското спортско воздухопловство на меѓународната сцена.
