Макрон: Путин не сака преговори, Европа мора да продолжи да ѝ помага на Украина

Францускиот претседател Емануел Макрон порача дека ограничувањето на помошта за Украина би значело наметнување неправеден мир, кој може да создаде услови за нова војна. Тој нагласи дека Франција нема да поддржи таков пристап и дека европските земји мора да продолжат да му помагаат на Киев.

Макрон ја упати пораката преку социјалните мрежи, во време кога САД посредуваат во преговорите меѓу Украина и Русија за завршување на војната што започна со руската инвазија во февруари 2022 година.

— реклама —

„Оние што сакаат да ја ограничат помошта за Украина, всушност сакаат да ја принудат да прифати неправеден мир, а со тоа посредно и цела Европа. Тоа е дух на пораз и рецепт за нова војна“, порача францускиот претседател.

По разговорите во Абу Даби, кои не донесоа значителен напредок, американските претставници Џаред Кушнер и Стив Виткоф одделно се сретнаа со рускиот претседател Владимир Путин и украинскиот претседател Володимир Зеленски. Сепак, било договорено европските земји да учествуваат во идните разговори за завршување на војната.

— реклама —

На состанокот во Даблин било договорено Франција, Германија, Италија, Обединетото Кралство и Полска да испратат свои претставници на преговорите.

— реклама —

Макрон оцени дека Европа мора целосно да учествува во напорите за постигнување праведен и траен мир, бидејќи случувањата во Украина директно влијаат врз европската безбедност.

Тој смета дека сојузниците на Украина треба да ја претстават својата визија за периодот по завршувањето на војната и јасно да ги дефинираат очекувањата од Вашингтон во однос на долгорочната безбедност на Европа.

— реклама —

Францускиот претседател исто така оцени дека Владимир Путин не сака да преговара, туку се обидува да ја ослабне Украина со засилени напади со беспилотни летала и ракети врз цивили и енергетската инфраструктура пред зимата.

„Мораме да продолжиме со финансиската поддршка и да ѝ помогнеме на Украина да го заштити населението, електраните и енергетската мрежа“, порача Макрон.