Француската влада не се откажува од намерата да го ограничи користењето на социјалните мрежи за лица помлади од 15 години. По одлуката на Уставниот совет, со која беше поништен клучниот дел од претходниот закон, Париз подготвил нов предлог што ќе ѝ биде доставен на Европската комисија.
Францускиот претседател Емануел Макрон изјави дека Владата, по детална техничка работа, пронашла решение за кое смета дека ќе биде во согласност со забелешките на Уставниот совет и со европското право.
„Оваа заштита мора да стане стандард и за сите европски деца“, порача Макрон, нагласувајќи дека Франција сака слична забрана да биде воведена на ниво на целата Европска Унија.
Уставниот совет на 14 август ја поништи забраната за користење социјални мрежи за лица помлади од 15 години, оценувајќи дека таа претставува несразмерно ограничување на слободата на изразување.
Претходно, францускиот парламент на 21 јули го усвои законот со кој се предвидуваше забрана за отворање нови профили за лица помлади од 15 години од 1 септември, како и укинување на постојните профили во рок од четири месеци, со задолжителна проверка на возраста.
По одлуката на Уставниот совет, Макрон го задолжи премиерот Себастијан Лекорни да подготви нов предлог.
