Дваесет и едногодишната бразилска манекенка Марија Едуарда Родригес де Фреитас трагично загина при банџи скок од мост висок 40 метри во бразилската сојузна држава Сао Паоло, откако организаторите не го прицврстиле безбедносното јаже на нејзиниот појас.
Несреќата се случила на мостот Понте до Ескелето во градот Лимеира. Според локалните медиуми, непосредно пред скокот младата манекенка објавувала фотографии и пораки на социјалните мрежи, изразувајќи возбуда поради авантурата.
На снимка која брзо се проширила на интернет се гледа како тројца инструктори ја подигаат девојката и ја туркаат од работ на мостот. Во моментот кога почнала да паѓа, присутните сфатиле дека безбедносното јаже не е прикачено на неа и почнале панично да викаат. Јажето, наместо да биде врзано за појасот на девојката, останало на мостот.
И покрај брзата интервенција на итната помош, лекарите можеле само да ја констатираат смртта на Марија Едуарда. Нејзиното тело било пренесено на обдукција, а властите веднаш започнале истрага за околностите под кои дошло до трагедијата.
Според бразилските медиуми, шест лица биле приведени по несреќата, а две од нив наводно се обиделе да побегнат од местото на настанот. Истражителите утврдуваат дали станува збор за сериозен пропуст и кривична одговорност на организаторите.
По трагедијата бил избришан профилот на компанијата што ги организирала банџи скоковите, како и комуникациската група преку која биле споделувани информации за настанот.
Несреќата отвори и прашања за безбедноста на мостот и контролата на ваквите активности, а градските власти во Лимеира најавија правни чекори против федералните институции, тврдејќи дека со месеци предупредувале на ризиците од неконтролиран пристап до локацијата.
