Министерот за правда Бојан Маричиќ од Анкара телефонски гостуваше во емисијата Утрински брифинг, каде говореше за посетата на Брисел и Анкара и дигитализацијата на судството.
Министерот брифираше дека во Брисел тој порачал дека Северна Македонија ќе продолжи интензивно да ги спроведува реформите дома, но дека е потребно ЕУ да не го губи фокусот и час поскоро да создаде услови за почеток на преговорите.
Говорејќи за посетата на Анкара, Маричиќ истакна дека главниот повод на посетата е размена на искуство во делот на едукацијата на кадрите во правосудството и дигитализацијата на судскиот систем.
- Денес ќе го посетам Генералниот директорат за информатичка технологија каде ќе имаме можност да видиме каков систем за дигитализација на судството имаат тука. Дигитализацијата кај нас ќе биде поддржана од нашите меѓународни партнери како амбасадата на САД, Мисијата на ОБСЕ во Скопје, Норвешката влада итн., информираше Маричиќ.
На турскиот колега, министерот за правда Ѓул, Маричиќ му го претставил планот за дигитализација на над 120 судови во земјата и истакнал дека искуствата кои ги има Турција во процесот на воведување на информатичка технологија во правосудството е од исклучително големо значење за нас.
