Марко Џорлев е светски шампион во карате за кадети, Ристовски: Гордост за цела Македонија

Младиот македонски каратист Марко Џорлев испиша историја освојувајќи златен медал на Светското првенство за кадети во Полска, а денеска за неговиот успех лично му честиташе министерот за спорт Борко Ристовски.

Ристовски го пречека младиот спортист во Министерството за спорт, каде што му го честиташе извонредниот резултат и историскиот успех за македонското карате.

— реклама —

Со победата во финалето на Светското првенство, Џорлев стана првиот македонски светски шампион во карате во кадетска конкуренција. Македонија на првенството во Полска настапи со вкупно 31 каратист.

— реклама —

„Ова е огромен успех за него, за македонското карате и за целиот македонски спорт“, истакна Ристовски во објавата посветена на младиот шампион.

Министерот посочи дека Џорлев е стипендист на Министерството за спорт во категоријата „Спортска надеж“, нагласувајќи дека неговиот успех е потврда оти вложувањето во младите таленти, нивната посветеност и континуираната работа носат резултати.

— реклама —

Ристовски додаде дека поддршката за младите спортисти е важна за нивниот развој и за создавање услови во кои ќе можат да го усовршуваат својот талент и да се борат за највисоките спортски достигнувања.

„Продолжуваме да инвестираме во младите таленти, затоа што зад секој голем спортски успех стојат многу труд, дисциплина и верба, но и вистинска поддршка“, порача министерот.

Со освоеното светско злато, Марко Џорлев оствари значаен успех за македонскиот спорт и испрати силна порака дека младите спортисти од Македонија можат да се искачат на светскиот врв.