Маскирани напаѓачи фрлиле молотов коктел на студентско собрание во Атина, тројца повредени

Тројца студенти биле повредени во насилен напад на студентско собрание на Математичкиот факултет во Атина, откако околу 50 маскирани лица со шлемови и метални шипки упаднале во кампусот и фрлиле Молотов коктел кон присутните.

— реклама —

Нападот се случил вчераутро во универзитетскиот кампус Зографу. Според грчките медиуми, во судирот учествувале членови на младинското крило на левоцентристичката партија ПАСОК и студенти од крајната левица.

— реклама —

Повредените биле пренесени во болницата „Ѓениматас“. Еден студент се здобил со длабока рана на бутот и бил задржан на хируршкото одделение. Тој им кажал на лекарите дека бил удрен со секира. Вториот имал изгореници на лицето, рацете и стапалата, но по лекарскиот преглед било утврдено дека нема потреба од болничко лекување. Третиот студент се здобил со повреди и гребаници од тепањето и ќе продолжи да се лекува дома.

— реклама —

Раководството на Универзитетот во Атина остро го осуди нападот, опишувајќи го како „насилна инвазија“ на надворешни групи. Од полицијата и обвинителството побара да ги откријат и казнат одговорните, нагласувајќи дека безбедноста на студентите и вработените е приоритет.

— реклама —

Нападот го осуди и Министерството за образование на Грција, кое побара од Универзитетот да ги претстави безбедносните мерки со кои ќе им гарантира на студентите безбеден пристап до кампусот во наредните денови.