Изложбата на германскиот уметник Отмар Херл во Салцбург е предвреме прекината откако од познатиот парк Мирабел биле украдени 210 од вкупно 230 позлатени минијатурни скулптури на Волфганг Амадеус Моцарт.
Станува збор за дел од поставка со околу 320 фигурини на славниот композитор, распоредени на повеќе локации во Салцбург по повод 270-годишнината од неговото раѓање.
Фигурите високи околу 50 сантиметри биле поставени во градините Мирабел во средината на јули. Херл смета дека кражбата не ја извршиле случајни туристи, туку дека станува збор за организирана акција.
„Најлошо за уметникот е кога неговото дело ќе исчезне“, изјавил Херл, додавајќи дека особено го погодува и недостатокот на почит кон неговата работа.
Според него, фигурините најверојатно биле украдени во текот на ноќта, кога градините биле затворени.
Иако не станува збор за милионска кражба, штетата за уметникот се проценува на околу 20.000 евра. Тој планирал по завршувањето на изложбата фигурините да ги продава по цена од 90 евра за парче.
Дополнителен проблем е што скулптурите се изработуваат со посебна техника во германскиот град Кобург. Производителот во моментов е на колективен годишен одмор, поради што не било можно веднаш да се обезбедат нови фигурини за замена.
Отмар Херл е познат по инсталациите составени од голем број сериски произведени минијатурни фигури на познати личности. Во минатото, во германски градови поставувал фигури посветени и на познати писатели како Фридрих Шилер, Јохан Волфганг фон Гете и Фридрих Хелдерлин.
