Украина отвори нов фронт во војната со Русија, започнувајќи масовна кампања со беспилотни летала против рускиот поморски сообраќај во Азовското Море. Според украинските власти, во последните девет дена биле нападнати дури 116 руски пловила, а првичните анализи покажуваат дека поморскиот сообраќај во регионот е намален за повеќе од половина.
Операцијата, наречена „MoLoChKa“, ја спроведуваат украинските Сили за беспилотни системи, а за разлика од претходните акции насочени кон руската Црноморска флота, овојпат главна цел се комерцијалните бродови што ја одржуваат руската логистика и извоз.
Командантот на украинските сили за беспилотни системи Роберт „Мадијар“ Бровди изјави дека меѓу главните цели се танкерите што пренесуваат нафта од руските терминали преку каналот Волга-Дон и Азовското Море до поголемите танкери во Црното Море.
„Парализата на руската флота за претовар практично го оневозможува извозот на руската нафта преку каналот Волга-Дон и Азовското Море“, изјави Бровди.
Покрај танкерите, нападите се насочени и кон товарни бродови, траекти и влечни бродови, кои имаат клучна улога во транспортот на стока, гориво и воени резерви кон окупираниот Крим.
Азовското Море претставува важен поморски коридор што ја поврзува јужна Русија со Црното Море преку Керчкиот Теснец. Преку оваа рута Москва извезува нафта, жито, челик и друга стока, а истовремено ја снабдува и својата војска на окупираните територии во јужна Украина.
Според „Ројтерс“, Русија на 10 јули привремено ја прекинала пловидбата низ каналот Дон-Азов по украинските напади, со што била нарушена една од клучните извозни рути. Аналитичарите проценуваат дека околу една четвртина од рускиот извоз на пченица поминува токму преку Азовското Море.
Украинските аналитичари велат дека целта на операцијата е изолирање на Крим и нанесување економски загуби на Русија преку нарушување на нејзините извозни коридори.
„Сега ефикасно ги напаѓаме руските бродови во Азовското Море, кое Русија по окупацијата на јужна Украина го сметаше за свое внатрешно море. Тоа влијае врз рускиот извоз и создава дополнителни економски загуби“, изјави аналитичарот Антон Земљаниј.
Дополнително, Џорџ Барос од Институтот за проучување на војната (ISW) наведува дека анализата на податоците од системот за автоматска идентификација на бродови (AIS) покажува пад од околу 55 проценти на бројот на пловила што се движат низ Азовското Море.
Според него, преостанатите бродови сè повеќе се задржуваат во близина на пристаништата и избегнуваат пловидба на отворено море. Иако дел од екипажите ги исклучуваат транспондерите за да не бидат откриени, Барос оценува дека тоа не обезбедува целосна заштита бидејќи пловилата можат да бидат лоцирани со сателитски радарски снимки.
„Засега не гледам ефикасни руски противмерки, освен значително намалување на поморскиот сообраќај“, заклучува Барос.
