Украинскиот претседател Володимир Зеленски изјави дека рускиот воздушен простор „де факто ќе биде затворен“ поради зголемениот ризик од украински беспилотни летала и ги повика авиокомпаниите и осигурителните компании да ги земат предвид ризиците.
„Украина не ја загрозува цивилната авијација, но превозниците што летаат до Москва, Санкт Петербург или други големи центри мора да го земат предвид ризикот од беспилотни летала. Руското небо де факто ќе биде затворено“, изјави Зеленски.
Рускиот претседател Владимир Путин ја оцени изјавата како директна најава за државен тероризам и најави остар воен одговор доколку Киев ги реализира најавените закани.
Путин порача дека руските вооружени сили добиле инструкции да подготват и да започнат масовни напади врз украинските енергетски објекти.
Во меѓувреме, Киев повика на „решителна стратегија“ за справување со руските закани во Европа. Претседателката на Европската комисија, Урсула фон дер Лајен, порача дека Европската Унија ќе остане обединета и дека хибридните напади „нема да останат без јасен одговор“.
Во услови на зголемени тензии, продолжија и меѓусебните напади меѓу Киев и Москва, при што Русија ги интензивираше воздушните напади врз цели во Украина.
