Маж со нож нападнал американски туристи во Атина

Двајца американски туристи се повредени во напад со нож во близина на јужниот влез на археолошкиот локалитет Акропол во Атина, а осомничениот е уапсен, соопшти грчката полиција.

Инцидентот се случил околу 8:03 часот, откако полицијата добила пријава дека маж со нож им се заканува на минувачи во близина на Музејот на Акропол и билетарниците, пренесуваат грчките медиуми.

— реклама —

Според првичните информации, напаѓачот без никаква провокација нападнал двајца туристи од Соединетите Американски Држави. Жената се здобила со повреда на бутот, додека мажот, кој се обидел да ја заштити, бил повреден на рачниот зглоб.

— реклама —

На повредените им била укажана лекарска помош на местото на настанот, по што биле пренесени во болницата „Црвен крст“. Според информациите, нивната здравствена состојба е стабилна.

— реклама —

Осомничениот е 60-годишен грчки државјанин, кој бил совладан и уапсен од припадници на Дирекцијата на полицијата во Атина. Според полицијата, тој и претходно бил приведуван поради навредливо однесување и поседување нож, а двапати бил упатуван на лекување во психијатриска установа.

— реклама —

Грчките медиуми наведуваат и дека налогот за негово присилно сместување во психијатриска установа, издаден во 2022 година, не бил спроведен бидејќи полицијата не успеала да го пронајде.