Францускиот напаѓач Килијан Мбапе откри дека во еден период од кариерата бил многу блиску до трансфер во Ливерпул, но на крајот решил да остане во Франција и да ја продолжи кариерата во Париз.
Во интервју за „Атлетик“, Мбапе раскажа дека неговата мајка била голем обожавател на Јирген Клоп и силно посакувала тој да заигра за англискиот клуб.
„Бев многу блиску до тоа да станам играч на Ливерпул. Мајка ми беше голем обожавател на Јирген Клоп и тоа беше нејзината посакувана дестинација. Таа сакаше да играм таму. Не ја послушав бидејќи сакав да играм во мојот роден град, Париз“, изјави Мбапе.
Францускиот фудбалер објасни дека во тој момент не сакал да ја напушти Франција пред да изгради име во својата земја.
Мајката на Мбапе дури учествувала во преговорите и го посетила „Енфилд“, каде што гледала натпревари и ја почувствувала атмосферата на стадионот.
„Мајка ми отиде на преговори. Таа беше во градот и велеше дека тоа е семеен клуб – неверојатен, огромен тим. Го посети „Енфилд“ и гледаше неколку натпревари сама за да ја почувствува атмосферата и едноставно се вљуби во неа“, раскажа Мбапе.
Тој потврди и дека лично се запознал со Клоп и дека меѓу нив постоела одлична поврзаност.
„Постојано разговаравме и таа ме убедуваше да одам таму бидејќи Јирген Клоп е одличен тренер. Се запознав со него и имавме одлична поврзаност. Имам голема почит кон него“, додаде Мбапе.
Сепак, трансферот никогаш не се реализирал. Мбапе во таа фаза од кариерата останал во Франција и се приклучил на ПСЖ, пред подоцна да направи трансфер во Реал Мадрид.
