Заменик-претседателот на Советот за безбедност на Русија, Дмитриј Медведев, изјави дека Москва располага со предлози за мирно решавање на иранското нуклеарно прашање, оценувајќи дека постигнувањето конечен договор меѓу Иран и САД ќе биде исклучително сложен процес.
Медведев ова го изјави по посетата на Техеран, каде што присуствуваше на погребната церемонија на поранешниот врховен лидер на Иран, ајатолахот Али Хамнеи. Тој рече дека престојот во иранската престолнина оставил позитивен впечаток врз него, иако, како што наведе, делови од градот биле уништени во американските воздушни напади.
Осврнувајќи се на нуклеарната криза, Медведев истакна дека Русија има конкретни идеи за мирно надминување на спорот, потсетувајќи дека токму иранската нуклеарна програма беше главниот повод за американските напади врз Иран.
Тој оцени дека Иран ја демонстрирал својата сила со блокирањето на сообраќајот низ Ормускиот Теснец, додавајќи дека во моментов се водат разговори за идното функционирање на овој стратешки важен поморски премин.
Медведев потврди дека со иранскиот претседател Масуд Пезешкијан разговарал и за идејата за создавање „платформа на санкционирани земји“, преку која Русија, Иран, Кина и други држави би соработувале во спротивставувањето на, како што ги нарече, незаконските санкции.
Според него, роковите за постигнување сеопфатен договор меѓу Техеран и Вашингтон веќе се пробиени, а дополнителен предизвик ќе бидат и разговорите за финансирање на обновата на Иран.
