Светската побарувачка за нафта ќе ослабне во текот на 2026 година поради растот на цените предизвикан од намалената понуда од регионот на Персискиот Залив, покажуваат најновите проценки на Меѓународната агенција за енергија (ИЕА).
Според извештајот на агенцијата, побарувачката годинава ќе се намали за 1,1 милион барели дневно и ќе изнесува околу 103,4 милиони барели дневно. Во вториот квартал е забележан особено изразен пад, при што побарувачката се намалила за пет милиони барели дневно.
Во исто време, понудата на нафта се очекува да се намали за 3,9 милиони барели дневно, на вкупно 102,4 милиони барели дневно, бидејќи намалените испораки од Блискиот Исток ќе го надминат растот на извозот од Северна и Јужна Америка. Тоа значи дека светскиот пазар годинава би можел да се соочи со дефицит од околу еден милион барели дневно.
ИЕА наведува дека војната блокирала повеќе од 14 милиони барели нафта дневно од регионот на Персискиот Залив. Сепак, доколку договорот меѓу Иран и САД за нормализирање на транзитот низ Ормускиот теснец почне да се спроведува, производството и извозот во регионот постепено би можеле да се обноват.
За 2027 година агенцијата прогнозира значително зголемување на понудата, што би можело да доведе до пад на цените и повторно закрепнување на побарувачката. Во таков случај, светскиот пазар би преминал во суфицит.
Во извештајот се посочува и дека стратешките резерви на нафта на земјите членки на ОЕЦД се намалени за 163 милиони барели од почетокот на војната и се на најниско ниво од декември 1990 година.
