Меланија Трамп прими руски и украински претставници во Белата куќа и повика на траен прекин на огнот

Првата дама на САД, Меланија Трамп, во Белата куќа се сретна со руски и украински претставници, повикувајќи ги двете страни да направат чекор кон траен прекин на огнот и поширок мировен договор.

— реклама —

На прес-конференцијата таа посочи дека неодамнешното хуманитарно примирје во украинскиот град Олешки, под руска окупација, може да послужи како пример за постигнување поширок мир.

— реклама —

„Заедно можеме да постигнеме нешто потрајно од привремен прекин на огнот“, порача Меланија Трамп, додавајќи дека секоја вистинска промена започнува со мал чекор. Таа истакна дека примирјето не би било можно без соработката на рускиот претседател Владимир Путин и украинскиот претседател Володимир Зеленски.

Украинскиот преговарач Давид Арахамија оцени дека договореното примирје создало можност двете страни да воспостават механизми за зачувување на мирот. Рускиот претставник Кирил Дмитриев, пак, ѝ се заблагодари на првата дама за нејзината улога во решавањето на хуманитарната состојба во Олешки.

— реклама —

Шестдневното примирје заврши во неделата навечер, а овозможи евакуација на жителите од градот во областа Херсон, кој со месеци се соочувал со недостиг од основни производи.

— реклама —

Според „Франс прес“, станува збор за најдолгиот прекин на огнот од почетокот на руската инвазија врз Украина во февруари 2022 година. Ниту Киев ниту Москва не пријавиле прекршување на договорот, за разлика од претходните делумни примирја, меѓу кои и оние за време на православниот Велигден.