Првата дама на САД, Меланија Трамп, во интервју за „Фокс бизнис“ зборуваше за своето детство во тогашна Југославија и оцени дека периодот на растење во комунистичкиот систем го памети позитивно.
„Израснав во комунизам и, всушност, ништо не ми недостигаше. Сметам дека имав прекрасно детство, а моите родители ѝ обезбедија прекрасен живот на нашето семејство“, изјави таа.
Нејзините ставови се разликуваат од реториката на нејзиниот сопруг, американскиот претседател Доналд Трамп, кој често го користи комунизмот како критика кон своите политички противници. Тој во повеќе наврати ги поврзува демократските социјалисти со комунизмот и предупредува на, како што го нарекува, комунистичко влијание во САД.
Меланија Трамп е родена во 1970 година во Ново Место, а детството го поминала во тогашната Социјалистичка Федеративна Република Југославија. Во САД се преселила во 1990-тите, каде што продолжила да работи како манекенка, а американско државјанство добила во 2006 година.
Таа сепак нагласи дека во тогашниот систем постоеле ограничувања и дека луѓето морале да внимаваат на своето однесување.
„Сепак, постоеја одредени работи на кои мораше да внимавате. Внимававте што правите“, рече Меланија, додавајќи дека тогаш немало исто ниво на слобода како во денешните САД и дека времињата биле поинакви.
Југославија била федерација предводена од комунистичката партија, но нејзиниот политички и економски систем се разликувал од советскиот модел. По прекинот на односите меѓу Јосип Броз Тито и Јосиф Сталин во 1948 година, земјата развила сопствен модел на социјализам, со работничко самоуправување и независна политика во однос на советскиот блок.
Словенија била економски најразвиената од шесте републики во федерацијата. По смртта на Тито во 1980 година, се зголемиле политичките и економските тензии, а Словенија во 1991 година прогласила независност.
