Мелони испраќа дополнителни 500 војници во Милано по грабежите и судирите

Властите во Милано распоредуваат дополнителни војници во пресрет на новите протести, по минатонеделните грабежи и судири со полицијата. Владата на премиерката Џорџа Мелони најави засилени безбедносни мерки, додека граѓанското незадоволство расте поради високите трошоци за живот, ниските плати и недостигот од достапно домување.

— реклама —

Мелони најави испраќање дополнителни 500 војници во Милано и построги казни за малолетниците. Во градот веќе се распоредени стотици војници, кои соработуваат со околу 5.000 полицајци. За време на минатонеделните дводневни протести биле уапсени 45 лица, од кои 34 малолетници.

— реклама —

Освен во Милано, засилени безбедносни мерки се спроведуваат и во Рим, каде што се блокирани одредени улици и се засилени контролите. Протести се најавени во најмалку девет италијански града, а организаторите ги повикаа учесниците да избегнуваат насилство.

— реклама —

Незадоволството е поттикнато од растечките трошоци за живот, скапото гориво и сè потешкиот пристап до станови. Во Рим илјадници луѓе протестираа на собир организиран од синдикатот ЦГИЛ, чиј лидер Маурицио Ландини најави генерален штрајк за 20 ноември.

Минатонеделните немири во Милано вклучуваа грабежи на продавници во близина на плоштадот Дуомо, додека во неколку италијански градови имало судири со полицијата. Во Болоња биле употребени водени топови, а во Милано демонстранти фрлале петарди и шишиња кон полициските сили.