Германскиот производител на автомобили Mercedes-Benz призна дека претерал со замената на класичните команди со екрани чувствителни на допир и најави дека во идните модели повторно ќе вградува повеќе физички копчиња и прекинувачи.
Директорот за продажба и маркетинг на компанијата, Матијас Гајзен, изјави за „Аутокар“ дека купувачите ги ценат големите дигитални екрани, но истовремено сакаат и класични команди за најчесто користените функции, како што се регулирањето на температурата, јачината на звукот и други основни поставки.
Според него, Mercedes уште пред две години сфатил дека ентериерите речиси целосно ослободени од физички копчиња не ги задоволуваат очекувањата на сите возачи. Сепак, компанијата нема намера да се откаже од големите дигитални дисплеи, кои ги смета за важен дел од модерниот луксуз и персонализацијата на возилата.
Првите промени веќе се направени, па на одредени модели хаптичките команди на воланот се заменети со класични тркалца, а слични решенија се очекуваат и кај останатите модели.
Сличен пристап во последните години усвоија и други производители, меѓу кои Volkswagen, Hyundai и Subaru, кои исто така повторно воведуваат физички команди по периодот на доминација на екраните на допир.
На ваквите промени влијаат и препораките за безбедност. Организацијата Euro NCAP планира во идните безбедносни тестирања дополнително да ги вреднува возилата што имаат физички команди за клучните функции, бидејќи истражувањата покажуваат дека прекумерното користење на екрани може да го одвлече вниманието на возачот и да го продолжи времето на реакција.
Од Mercedes порачуваат дека иднината ја гледаат во комбинација од големи дигитални екрани и практични физички команди, со цел да се подобрат корисничкото искуство и безбедноста при возење.
