Просечната нето-плата исплатена во Македонија во јуни изнесувала 48.381 денари, што е за 1.163 денари помалку во споредба со мај, кога просечната плата изнесувала 49.544 денари, покажуваат најновите податоци на Државниот завод за статистика.
И покрај месечниот пад, на годишно ниво просечната плата е зголемена за 6,4 отсто. Растот, според статистичките податоци, во најголем дел се должи на повисоките плати во административните и услужните дејности, каде што зголемувањето е речиси 11 отсто. Раст има и во земјоделството, шумарството и рибарството, од над 8 отсто, како и во транспортот и складирањето, каде што платите пораснале за 8 отсто.
Сепак, во дел од дејностите е регистриран пад на просечната плата во однос на мај. Најголемо намалување има кај трговијата на големо и мало и поправката на моторни возила и мотоцикли, од 9 отсто, потоа кај уметноста, забавата и рекреацијата, од 6,2 отсто, и кај снабдувањето со електрична енергија, гас, пареа и климатизација, од 5,9 отсто.
Економистите предупредуваат дека растот на просечната плата не значи автоматски и подобар животен стандард. Според нив, инфлацијата значително го намалува ефектот од повисоките примања, а просечната плата не ја отсликува реалната состојба на сите работници.
„Просекот не го чувствуваат сите. Има луѓе кои живеат со минимална плата, има човек кој заработува 30-35 илјади денари и тој има друга реалност со некој кој има 70 или 80 илјади денари. Добра вест е што платите растат, но инфлацијата ја изеде таа плата“, вели економистот Абил Бауш.
И покрај растот на платите, Македонија останува меѓу земјите со најниски просечни примања во регионот. Според податоците наведени во изворот, просечната плата во Србија е околу 945 евра, во Црна Гора 1.018 евра, во Босна и Херцеговина 815 евра, додека во Хрватска е околу 1.500, а во Словенија 1.630 евра.
