Мицкоски до Апасиев: Туѓите бизниси ти сметаат, а скапите хотели и шопингот во Солун не

Премиерот Христијан Мицкоски упати остри критики кон претседателот на Левица и пратеник Димитар Апасиев на денешната собраниска седница, обвинувајќи го дека изнесува лаги и клевети од собраниската говорница и повикувајќи го истите тврдења да ги повтори јавно пред медиумите, за потоа да се соочат на суд.

Мицкоски реагираше и на наводите поврзани со неговиот баџанак Јорданчо Јанев, нагласувајќи дека неговата сопруга е сестра на сопругата на Јанев. Тој ги отфрли тврдењата дека Јанев добил бугарски пасош во 2017 година, посочувајќи дека, според него, документот го поседува од 2003 година.

„Почитуван Апасиев, навистина не ве бивало за бизнис. Сега сфатив зошто имате толку голема фрустрација од овој трет ешалон, каде што вие не можевте ни на десеттиот да дојдете во таа политичка партија, па моравте неколку да смените во меѓувреме“, му порача Мицкоски на пратеникот.

— реклама —

Премиерот го обвини Апасиев дека ја користи пратеничката говорница за изнесување обвинувања без да сноси одговорност за нив и го повика јавно да ги повтори пред медиумите, нагласувајќи дека е подготвен спорот да го решаваат пред суд.

„Овде сум јас инфериорен, бидејќи после мене вие ќе излезите и ќе фрлите уште нов грст лаги и клевети. И нормално, како секоја кукавица, ќе ја искористите или злоупотребите собраниската говорница без притоа да немате некаква кривична одговорност ниту за клевета, ниту пак за нешто друго. Јас ве поканувам како голем маж, храбар маж, што не сте, а не обична кукавица, да излезете ова што денеска го кажавте и надвор пред медиуми на прес-конференција да го кажете, и тогаш ќе се најдеме во арената каде што вие сте најјак, а тоа е судот. Па ќе мора ова што денеска го кажавте да го докажете“, рече Мицкоски.

Осврнувајќи се на Јорданчо Јанев, премиерот раскажа дека неговиот баџанак потекнува од семејство чии родители останале без работа за време на транзицијата. Според неговото објаснување, таткото на Јанев, по губењето на работното место во тогашната фабрика „Треска“, му дал камион со кој почнал да заработува за да го издржува семејството, по што тој развил сопствен бизнис, кој трае повеќе од 25 години.

— реклама —

„Инаку, да, мене Јорданчо Јанев ми е баџанак, односно неговата сопруга е сестра на мојата сопруга. Инаку, не ви е точен податокот дека од 2017-та има бугарски пасош, туку од 2003 година“, рече Мицкоски.

Тој додаде дека не гледа ништо спорно во тоа некој да заработува во странство и средствата да ги вложува или троши во Македонија, без оглед на тоа дали поседува бугарско државјанство.

— реклама —

„Јас навистина не можам да сфатам што е грев, па дури и да е бугарски граѓанин, па дури и да, еве, во Бугарија да прави бизнис во левови, милиони, како што кажувате, и тие пари да ги донесе во Македонија и тука да ги троши“, истакна премиерот.

Во продолжение, Мицкоски го обвини Апасиев дека го критикува деловното работење на други луѓе, додека, според него, самиот и неговото семејство трошат пари на скапи хотели на Егејското крајбрежје, шопинг во Солун и скапа гардероба.

Премиерот упати критики и за изјавите на Апасиев поврзани со прославата на Светите Тивериополски свештеномаченици, која е градска слава во Струмица, обвинувајќи го дека со своите настапи ги омаловажува верските обичаи.

Мицкоски повторно го повика пратеникот да ги изнесе јавно своите тврдења, наместо да ги кажува само во Собранието, и порача дека е подготвен за судска разрешница.

На крајот, премиерот се осврна и на финансирањето на ВМРО-ДПМНЕ, посочувајќи дека партијата има илјадници донатори, членови и симпатизери кои финансиски ја поддржуваат. Истовремено, упати обвинувања кон политичките противници дека добиваат хонорари и дневници од партијата, а потоа средствата ги вложуваат во угостителски објекти, меѓу кои кафулиња и ноќни клубови, од кои остваруваат профит.

„За разлика од кај вас, кои земате од партијата хонорари и дневници, и тие потоа ги трошите, купувате објекти, кои потоа се кафе-барови, ноќни клубови и кафулиња, ги регистрирате, го црпите профитот од таму, за да можете вашите хедонистички навики вие и вашето семејство да ги покажете на јавна сцена“, изјави Мицкоски.