Премиерот Христијан Мицкоски, одговарајќи на пратеничко прашање во Собранието, упати критики до лидерот на СДСМ, Венко Филипче, тврдејќи дека за време на неговиот мандат како министер за здравство биле евидентирани бројни случаи на бактериолошки и физичко-хемиски неисправна вода за пиење, без соодветна реакција од надлежните институции.
Мицкоски посочи извештаи од Центарот за јавно здравје – Прилеп од 2019 година, кои, според него, се однесувале на Прилеп, Крушево и Македонски Брод и покажувале неисправни примероци на вода. Тој тврдеше дека во извештаите било наведено дека не биле преземени мерки за надминување на состојбата.
Премиерот изјави дека располага со повеќе вакви извештаи, меѓу кои и за Гостивар и околните населени места, нагласувајќи дека Филипче во тој период бил министер за здравство.
Во однос на актуелната состојба во Гостивар, Мицкоски рече дека бројот на неисправните примероци на вода постепено се намалува и изрази очекување дека во наредните неколку дена граѓаните ќе добијат целосно исправна вода и за пиење.
Тој воедно го повика Јавното обвинителство да ги разгледа наводите содржани во извештаите од 2019 година и да утврди дали постоела евентуална одговорност за непостапувањето по констатираните наоди.
