Мицкоски до Крмов: Доколку не знаете како да помогнете за Алта Банка, немојте да одмагате со гласини – оставете на тие што знаат и што сакаат да помогнат

Премиерот Христијан Мицкоски му порача на пратеникот Борислав Крмов дека доколку не ја познава постапката за решавање на состојбата со АЛТА банка, не треба да шири гласини и да ја отежнува ситуацијата. Ова го истакна на надзорната расправа во собраниската Комисија за финансирање и буџет, одговарајќи на прашањата за можниот стечај на банката и условите за нејзина продажба.

— реклама —

Крмов праша дали Мицкоски ќе понесе одговорност доколку банката замине во стечај, како и како би можела да биде продадена без дозвола од Агенцијата за осигурување на депозити на Србија.

Мицкоски оцени дека Крмов не ја познава законската постапка и нагласи дека претставниците на Народната банка треба да ги дадат потребните објаснувања. Тој рече дека тврдењата на пратеникот се неточни и повика да им се остави простор на оние што, како што рече, знаат и сакаат да помогнат банката да не оди во стечај, туку да добие купувач и да продолжи да работи.

— реклама —

„Ако не сакате да помогнете, ве молам најљубезно, немојте да одмагате. Оставете на тие што знаат и што сакаат да помогнат да ја решат работава и да не оди банката во стечај, туку да си добие купец“, рече Мицкоски.

— реклама —

Во однос на обвинувањата дека Владата наводно им препорачувала на македонските институции да депонираат средства во АЛТА банка, премиерот ги отфрли таквите тврдења и рече дека не би се впуштил во такви постапки.

Мицкоски возврати со изнесување гласини за наводни обиди на Левица да добие повисока камата за орочување средства со цел купување деловен простор во Битола. Тој нагласи дека надзорната расправа треба да се темели на факти, а не на непроверени тврдења.

— реклама —

„Подобро да не зборуваме за гласини, туку да се држиме до факти. Апсолутно такви факти не постојат. Ниту јас, ниту пак кој било друг има намера на таков начин да се однесува“, изјави Мицкоски.