Премиерот Христијан Мицкоски изјави дека директорот на Агенцијата за остварување на правата на заедниците, Далибор Китановиќ, нема да биде разрешен по објавата на социјалните мрежи, во која го величеше правосилно осудениот воен злосторник Ратко Младиќ.
Одговарајќи на новинарско прашање дали Китановиќ ќе понесе одговорност, Мицкоски рече дека не е информиран оти станува збор за кривично дело, но нагласи дека личниот став на директорот не е став на Владата.
„Владата имаше свое соопштение. Владата е демократска, има своја дебата во рамките на коалицијата и кога ќе се донесе став за одредено прашање, сите чинители на Владата треба тој став да го следат“, рече Мицкоски.
Тој додаде дека во коалициска Влада, секоја индивидуална постапка е личен став и не претставува став на Владата.
„Господинот го повлече својот став, се извини и мислам дека сега не треба да го распнуваме за нешто и да бараме кривична одговорност за нешто за што самиот сфатил дека погрешил, се извини и го повлекол својот став“, порача Мицкоски.
Китановиќ, по реакциите во јавноста, ја избриша објавата и се извини, но во својата реакција не призна дека Младиќ бил воен злосторник. Тој тврдеше дека бил подложен на политичка хајка и дека не сакал да навреди или повреди припадници на кој било народ, вера или етничка заедница.
На објавата на Китановиќ претходно реагираа опозициски партии и граѓански организации, барајќи одговорност од него и од други функционери поради нивните ставови поврзани со Младиќ.
Од СДСМ го обвинија Мицкоски дека со тоа што не бара одговорност од Китановиќ и министерот за локална самоуправа Иван Стоилковиќ, фактички ги толерира нивните ставови.
