Мицкоски му се јавил на Срдановиќ по победата во Србија: „Му честитав и му посакав успех“

Премиерот Христијан Мицкоски денеска телефонски разговарал со проф. д-р Илија Срдановиќ, носител на Студентската листа во Србија, по победата на студентското движење на парламентарните избори.

— реклама —

Мицкоски соопшти дека лично му го честитал изборниот резултат на Срдановиќ и му посакал успех во периодот што следува.

— реклама —

„Денес телефонски разговарав со проф. д-р Илија Срдановиќ, носител на Студентската листа во Србија. Му честитав за постигнатиот изборен резултат и победата, му посакав успех во периодот што следува“, објави премиерот.

Тој изрази очекување дека политичките промени во Србија нема да влијаат негативно врз односите меѓу двете земји и дека соработката ќе продолжи.

— реклама —

„Верувам дека добрите меѓудржавни односи, меѓусебното почитување и соработката ќе продолжат да се развиваат во интерес на граѓаните на двете држави“, порача Мицкоски.

Телефонскиот разговор следува по парламентарните избори во Србија, на кои Студентската листа оствари победа над коалицијата предводена од Александар Вучиќ, означувајќи промена во политичките односи во соседната држава.