Мицкоски најави лидерска средба во декември: Владата е најстабилна во регионот

Премиерот Христијан Мицкоски најави дека во текот на декември ќе се одржи лидерска средба на коалициските партнери, нагласувајќи дека владината коалиција има стабилно парламентарно мнозинство и дека нејзината позиција не е загрозена.

— реклама —

По пуштањето во употреба на градинка во Инџиково, Мицкоски изјави дека Владата располага со поддршка значително поголема од потребните 61 пратеник во Собранието.

„Владата се избира со мнозинство од 61 пратеник во парламентот. Ние имаме мнозинство кое е многу поголемо од 61 пратеник, така што Владата е стабилна, односно најстабилна во овој дел на Европа, можеби и пошироко“, рече Мицкоски.

— реклама —

Премиерот потврди дека разговарал со лидерот на ЗНАМ, Максим Димитриевски, и најави дека во декември ќе има средба на лидерско ниво меѓу коалициските партнери. Во однос на ставовите на ЗНАМ за моделот на полагање на правосудниот испит, тој упати прашањата да му бидат поставени директно на Димитриевски.

— реклама —

Лидерот на ЗНАМ претходно најави дека партијата би можела да ја напушти Владата доколку се прифати полагање на правосудниот испит на јазик различен од македонскиот.

Мицкоски појасни дека предложениот модел, кој е доставен до Венецијанската комисија, предвидува испитот да се полага во два дела. Теоретскиот дел, поврзан со материјалот од додипломските студии, би можел да се полага на јазикот на кој кандидатот го завршил високото образование во земјава, доколку тој е различен од македонскиот, како што се албанскиот, турскиот или англискиот јазик.

— реклама —

Вториот дел би опфаќал симулација на два судски процеси – кривичен и граѓански – и би се полагал на македонски јазик. Владата, според најавите, ќе побара итно мислење од Венецијанската комисија за предложеното решение.