Ние сме навикнати четири и пол години, колку што сум јас претседател, ова да се случува. Тие се пресметуваат со мене, индиректно се пресметуваат на ваков начин брутален, со луѓето кои што соработуваат со мене и со луѓето кои што се дел од раководството на ВМРО-ДПМНЕ, вели претседателот на ВМРО-ДПМНЕ проф. д-р Христијан Мицкоски од Гевгелија каде што присуствуваше на пуштање во употреба на спортско игралиште во рамките на активноста „Промените се случуваат, секогаш со народот“, каде беше запрашан за коментар за бркањето од работа на Наќе Чулев по 25 години професионална служба во безбедносниот систем на државата.
„Ова не е нешто ново, бидејќи сите знаете дека станува збор за врвен професионалец кој што 25 години работи во безбедносниот систем, извршувал врвни функции, врвни државни функции, сега е избркан од страна на овој, според некој бирократи во Брисел, проевропски режим, но според меродавните ранг листи, хибриден режим кој што не може да се соочи со неистомисленици и посегнува вака брутално по нивното лично и човечко достоинство“, рече Мицкоски.
Но, додава Мицкоски, мојата порака и до нив е дека, поминува времето, познавав јас и во минатото многу вака луѓе кои што се силеа, па потоа беа мачени, ќе дојде и тој ден кога повторно ќе се соочиме, повторно ќе се видиме и тогаш ќе мораме да дадеме одговори на многу прашања, а ние ќе го издржиме ова.
Мицкоски истакна дека Наќе Чулев ја има неговата целосна поддршка и дека е исклучително важна алка во партијата, кој од сега ќе биде уште по посветен во структурата на ВМРО-ДПМНЕ.
„Наќе Чулев ја има мојата целосна поддршка, Наќе Чулев е исклучително важна алка во структурата на ВМРО-ДПМНЕ. Сега ќе биде многу по посветен во делот и околу мене и во структурата на ВМРО-ДПМНЕ. ВМРО-ДПМНЕ не остава ниту еден свој човек. Наќе Чулев ќе биде дел и продолжува да биде дел од ВМРО-ДПМНЕ, да се бори за ВМРО-ДПМНЕ“, рече Мицкоски.
