Мицкоски: Нема предвремени избори, следните две години треба да обезбедиме пет милијарди евра

Предвремени парламентарни избори нема да има, бидејќи во следните две години Македонија треба да обезбеди пет милијарди евра за враќање и рефинансирање на долговите, а шестмесечна техничка влада во тој период би била неодговорен потег. Ова го порача премиерот Христијан Мицкоски, кој нагласи дека во 2027 година треба да се обезбедат 2,3 милијарди евра.

Мицкоски на брифинг со новинарите рече дека, од политички аспект, на власта ѝ одговараат избори, но суштинските финансиски обврски на државата не дозволуваат таков потег.

— реклама —

„Шест месеци техничка влада ќе ја однесе државата директно во банкрот. И таа техничка влада ќе биде во пикот на најжестоката зима во јануари и делумно можеби во февруари“, изјави премиерот.

— реклама —

Тој објасни дека станува збор за обврски преземени во времето на пандемијата, средства што треба да се вратат, како и пари за рефинансирање долгови, плаќање камати и покривање на буџетскиот дефицит. Според него, во 2028 година ќе треба да се обезбедат околу 2,7 милијарди евра, но дел од обврските ќе можат да се пренесат во 2029 година.

Мицкоски откри дека разговарал со лидерот на ЗНАМ, Максим Димитриевски, за спорот околу јазикот на кој ќе се полага правосудниот испит. Тој му го претставил предлогот за комбиниран модел, кој е испратен на мислење до Венецијанската комисија. Премиерот не откри дали Димитриевски и натаму останува на најавата дека ЗНАМ би можело да ја напушти Владата доколку испитот се полага и на албански јазик.

— реклама —

Според предложениот модел, теоретскиот дел од испитот би можел да се полага на јазикот на кој кандидатот го завршил високото образование, додека писмениот дел, кој опфаќа симулација на два судски случаи – кривичен и граѓански – би се полагал на македонски јазик и со кирилично писмо. Доколку Венецијанската комисија даде негативно мислење, предлогот ќе биде преработен.

— реклама —

Премиерот порача дека и доколку ЗНАМ ја напушти Владата, тоа не значи автоматски предвремени избори, бидејќи владејачкото мнозинство има 75 до 76 пратеници во Собранието.

Во меѓувреме, Мицкоски најави дека по средбата со копретседателите на Вреди, Изет Меџити и Билал Касами, треба да бидат договорени и кадровските решенија за неколку испразнети заменик-министерски места, меѓу кои во ресорите социјална политика и култура.