Мицкоски од говорницата на ОН: Не бараме полесен пат кон ЕУ, туку пат заснован врз правила

Премиерот Христијан Мицкоски се обрати пред 81. Генерално собрание на Обединетите нации во Њујорк, од каде порача дека Македонија не бара полесен пат кон Европската Унија, туку јасни, еднакви и предвидливи правила.

Во своето обраќање Мицкоски се осврна на промените и предизвиците со кои се соочува светот, нагласувајќи ја потребата од посилна меѓународна соработка.

— реклама —

„Иднината не смее да ја градиме само со моќ, туку со правила, дијалог и заедничка одговорност“, порача Мицкоски.

Според него, искуството на Македонија покажува дека мирот не започнува дури со завршувањето на војната, туку тогаш кога политиката успева да спречи конфликтот воопшто да започне.

— реклама —

„За мала земја како Македонија, меѓународниот поредок не е академско прашање, туку прашање на опстанок, безбедност и право секоја држава, без разлика на нејзината големина, да има достоинство и глас“, рече Мицкоски.

Посебен дел од пораката го посвети на европскиот пат на државата.

— реклама —

„Ние сме мала земја, но одбиваме големината на нашата територија да ја одредува големината на нашата амбиција. Не бараме полесен пат кон Европската Унија, туку пат заснован врз правила. Не бараме пониски стандарди, туку стандарди што се јасни, еднакви и предвидливи“, истакна премиерот.

Во завршната порака Мицкоски нагласи дека меѓународниот систем треба да почива врз правила што ќе важат еднакво за сите држави.

— реклама —

„Нашата должност е да оставиме свет во кој моќта не е единствениот аргумент, каде правилата важат за сите и каде секоја држава има право на достоинство, сигурност и иднина. Тоа е светот што им го должиме на генерациите што доаѓаат“, порача Мицкоски.

Обраќањето е дел од генералната дебата на 81. сесија на Генералното собрание на ОН, која се одржува од 22 до 28 септември во седиштето на Обединетите нации во Њујорк.