Претседателот на ВМРО-ДПМНЕ, Христијан Мицкоски, соопшти дека е потпишан Договор за политичко партнерство, соработка и поддршка со Демократската партија на Турците на Македонија, со што оваа партија станува дел од парламентарното мнозинство.
Мицкоски истакна дека со договорот се зацврстува политичката стабилност и се создаваат услови за продолжување на реформите и реализација на проектите. Според него, партнерството се темели на доверба, заемно почитување и заедничка определба за работа во интерес на сите граѓани.
Тој нагласи дека турската заедница е значаен дел од македонското општество и оцени дека соработката е доказ дека политиките можат да ги обединуваат луѓето околу заеднички цели.
Мицкоски информираше дека со приклучувањето на Демократската партија на Турците на Македонија, коалицијата предводена од ВМРО-ДПМНЕ во Собранието ќе брои 59 пратеници.
Во своето обраќање тој порача дека проширувањето на парламентарното мнозинство не е причина за самозадоволство, туку претставува поголема обврска за исполнување на ветувањата и испорачување резултати.
Осврнувајќи се на политичката состојба, Мицкоски рече дека на државата ѝ е потребна силна, сериозна и конструктивна опозиција, оценувајќи дека тоа е важно за демократијата, институциите и интересите на граѓаните.
Тој додаде дека амбицијата на ВМРО-ДПМНЕ не е само изборна победа, туку градење политичка сила која обединува околу развојот на државата, економскиот напредок, владеењето на правото и подобар живот за сите граѓани, без оглед на нивната етничка, верска или политичка припадност.
