Мицкоски: По речиси две и пол години стигнавме до точка нула, сега очекувам раст

Индустрискиот промет во Македонија бележи раст од над 5,5 проценти во споредба со истиот период минатата година, што премиерот Христијан Мицкоски го оцени како охрабрувачки показател за економската активност.

— реклама —

Тој посочи дека позитивните резултати се особено значајни во услови на актуелните економски состојби во светот и Европската Унија, која е најголем трговски партнер на земјава. Растот на индустрискиот промет, според Мицкоски, се надоврзува и на претходно забележаното зголемување на извозот.

— реклама —

Премиерот оцени дека економските показатели не ги потврдуваат очекувањата на опозицијата за негативни резултати. Според него, по речиси две и пол години консолидација, земјата стигнала до „точка нула“, од која очекува натамошен раст и поинтензивен развој.

— реклама —

„Сите индикатори укажуваат на тоа што ние уште на самиот почеток го велевме, дека треба трпение, дека мора полека да ги консолидираме работите и еве конечно, по речиси две и пол години, дојдовме до точка нула, а бевме во длабок минус“, изјави Мицкоски, додавајќи дека идниот развој ќе зависи и од состојбите во светот.

— реклама —

Ова го истакна при увидот во градежните активности на проектот „Подобрување на системот за водоснабдување во руралната населба Каменик“, во Општина Кисела Вода.