Претседателот на Владата, Христијан Мицкоски, при денешната посета на фармацевтската компанија А.Д. „Алкалоид“ во Скопје изјави дека претставува голема чест и задоволство да се видат производни капацитети кои се рамноправни со најсовремените светски фармацевтски компании.
Мицкоски истакна дека посебна гордост е тоа што „Алкалоид“ е македонска компанија, која со своето работење ја претставува државата на најдобар можен начин. Тој упати благодарност до директорот, менаџментот и сите вработени кои, како што рече, секојдневно покажуваат со што располага македонската фармацевтска индустрија.
„Повеќе од 3.000 вработени ја градат својата иднина во ‘Алкалоид’, најголемиот дел од нив во Македонија, а дел и во претставништвата надвор од државата. Повеќе од две третини од портфолиото на компанијата е извозно, што директно влијае на економската состојба, растот на БДП и индустриското производство“, нагласи Мицкоски.
Тој порача дека Владата ќе продолжи да ги поддржува ваквите успешни македонски приказни, бидејќи, како што рече, нема поголем промотор за една држава од компании кои успешно работат и надвор од нејзините граници.
На крајот, премиерот им честиташе на вработените и на менаџментот на „Алкалоид“, упатувајќи благодарност и до министерот за здравство и директорот на Фондот за здравствено осигурување, со порака дека заеднички ќе продолжат да нижат успеси и да го унапредуваат работењето и портфолиото на компанијата.
