Денес е финалниот акт на еден срамен процес во кој Република Макеоднија е втурната од страна на Зоран Заев и владеачкото мнозинство, во кој до промената на Уставот се доаѓа преку недемокатски пат, изјави лидерот на опозициската ВМРО-ДПМНЕ, Христијан Мицкоски.
„ВМРО-ДПМНЕ нема да учествува во тој процес и нема да даде легитимитет затоа што таквите измени немаат легитимитет од граѓаните. Тие се штетни и оставаат белег врз македонското достоинство и идентитетот. Имаме процес на промена на Уставот преку промена на уставното име, преку пазарење и уцени, а за таа цел има злоупотреба на обвинителството и судството.
Кацарска судството и рускоска обвинителството и СЈО се механизмите на власта за пресметка и уценување. На референдум Зоран Заев не доби поддршка за менување на Уставот и името, туку тоа го прави на криминален начин“, изјави Мицкоски.
Тој додаде дека останува запишано дека името не го менуваат граѓаните туку 80 пратеници обезбедени преку уцени и закани.
„Ќе прашам, европски вредности ли се тоа? Сите оние кои се залажуваат дека на овој начин ќе дојдеме до европска Македонија се лажат. Вака сме се подалеку, бидејќи Европа е вредност и принципи, кои што владеачкото мнозинство ги крши. Оваа Влада спроведува политика која нема легитимитет од граѓаните. Мојата татковина, татковината на граѓаните е Република Македонија, онаа за која мнозинството гласаше на референдум на 8 септември“, вели Мицкоски.
Тој додаде дека во ваква ситуација преостанува само отпорот.
„Јас ќе го користам демократското право да протестирам и пркосам на се она што се случува денес и следните денови во Собранието. Ве молам да не подлегнувате на провокации, да ни се придружите и да останеме достоинствено, иако државата е окупирана“, изјави Мицкоски.
