Македонија денес е меѓу првите пет земји во Европа според растот на бруто-домашниот производ, а за помалку од две години се реализирани бројни проекти што со години биле оставени без завршница, истакна претседателот на ВМРО-ДПМНЕ и премиер Христијан Мицкоски на одбележувањето на 36-годишнината од основањето на партијата во Струмица.
Обраќајќи се пред присутните на настанот што се одржа под мотото „Македонија забрзува, наша обврска“, Мицкоски посочи дека Владата за релативно краток период успеала да постигне значајни резултати во економијата, инфраструктурата и социјалните политики.
„Поминавме безмалку две години. Покажавме дека и со скромни ресурси можеме да направиме многу. Денес Македонија е меѓу првите пет земји во Европа според растот на БДП. Постигнавме историски рекорд со повеќе од 1,255 милијарди евра странски директни инвестиции. Работиме на шест нови автопати, ги зголемивме пензиите, градиме студентски домови и обезбедивме електронски уреди за студентите. Реализираме проекти што со години биле заборавени“, рече Мицкоски.
Тој најави дека во текот на неделата ќе биде објавен тендер за изработка на физибилити студија и техничко решение за патното поврзување меѓу Радовиш и Струмица, проект што, како што нагласи, е од големо значење за развојот на регионот.
„Оваа недела ќе биде објавен тендерот за физибилити студија и техничко решение за патот што ги поврзува Радовиш и Струмица. Тоа ќе биде дополнителна вредност на денешниот настан, кога конечно беше ставена во функција болницата во Струмица, објект што четири децении не бил завршен“, истакна премиерот.
Во своето обраќање Мицкоски се осврна и на најавените кадровски промени во извршната власт, посочувајќи дека следува реконструкција на Владата.
„Од утре почнувам интензивно да работам на реконструкцијата на Владата. Веќе сме во завршна фаза на екипирањето и промените во партијата, каде што околу 30 проценти од претседателите на општинските комитети се нови“, рече Мицкоски.
Тој оцени дека земјата се движи во позитивна насока и дека Владата ќе продолжи со реализација на инфраструктурни, економски и развојни проекти во периодот што следува.
