Лидерот на ВМРО-ДПМНЕ Христијан Мицкоски вечерва во Битола изјави дека премиерот Зоран Заев пропуштил да одржи државнички прес со државничко обраќање.
Според Мицкоски, кај ВМРО ДПМНЕ се потврдуваат сомневањата дека постои директна спрега меѓу владејачката партија и како што рече „Рускоска Обвинителството“.
-Ние во минатото зборувавме дека имаме исклучително корумпирано јавно обвинителство кое што е под палката на Катица Јанева и времето покажа дека нашите тврдења биле точни. Денес премиерот ги потврди нашите тврдења дека постои директна спрега меѓу владејачката партија и „Русковска обвинителството“. За жал денес премиерот пропушти да одржи државнички прес, со државничко обраќање до сите граѓани и заеднички да направиме чекор напред, изјави Мицкоски од Битола.
Според Мицкоски, ВМРО-ДПМНЕ продолжува да работи на својот предлог закон за ЈО, чија основна цел ќе биде да се обезбеди правда за сите.
Тој додаде дека има различни шпекулации за тоа каде се наоѓа специјалната обвинителка во оставка, Катица Јанева, која и него како лидер на ВМРО -ДПМНЕ, го уценувала и барала поддршка на законот за јавно обвинителство во замена за одмрзнување на имотот на најголемата опозициона партија.
„Денеска добив информации дека на сите гранични премини има знак „С“ што значи да се задржи, да не се пушти да ја напушти територијата, како да ви кажам преседан за кој што навистина не постојат правни аргументи со кои може да се одбрани“ рече Мицкоски.
Инаку вечерва Христијан Мицкоски беше во Битола. Пред партиското седиштето се одбележаа 29 години од формирањето на ОК на ВМРО ДПМНЕ во Битола.
