Мицкоски уверува дека струјата нема да поскапи

Премиерот Христијан Мицкоски уверува дека Владата ќе продолжи да се залага цената на електричната енергија за домаќинствата да остане непроменета и во претстојниот регулаторен период. Тој рече дека енергетската стабилност е приоритет, и покрај, како што оцени, рекордно високите цени на енергенсите на светските берзи.

Одговарајќи на новинарско прашање за цената што ЕСМ следниот месец ќе ѝ ја понуди на Регулаторната комисија за енергетика, Мицкоски посочи дека Владата се бори да нема зголемување на сметките за струја.

— реклама —

„Кога станува збор за електричната енергија, се бориме — и тоа е наш приоритет — да остане цената иста, да немаме зголемување. Тоа, впрочем, го правиме во три регулаторни периоди“, изјави Мицкоски.

— реклама —

Тој оцени дека цените на енергенсите во Европа и регионот бележат високи нивоа, посочувајќи дека во некои европски земји дизелот и безоловниот бензин чинат повеќе од три евра за литар, додека во Македонија цената, според неговите зборови, е под 1,6 евра.

Во однос на формирањето на цената на струјата, премиерот нагласи дека ЕСМ не е единствената компанија чии трошоци и одлуки влијаат врз конечната цена. Тој ги посочи и операторот и дистрибутерот на електрична енергија, додавајќи дека треба да се земат предвид и нивните барања.

— реклама —

На прашањето дали ЕСМ ќе понуди цена пониска од сегашните 65 проценти или, пак, ќе има зголемување, Мицкоски не даде конкретен одговор за понудената цена, туку повтори дека целта на Владата е таа да остане непроменета.

„Во овие услови какви што се денеска на берзите, и 65 е трипати пониска од таа што ја плаќаат во соседството и граѓаните во Европа. Ќе се бориме да остане истата цена за граѓаните“, рече премиерот.

Постапката за утврдување на новата цена треба да се спроведе пред Регулаторната комисија за енергетика, која ќе ги разгледа поднесените барања и трошоците на компаниите вклучени во снабдувањето со електрична енергија.