(Видео) Мицкоски во ОН: „Ние сме мала земја, но одбиваме големината на нашата територија да го одредува размерот на нашата амбиција“

Претседателот на Владата, Христијан Мицкоски, во обраќањето пред Генералното собрание на Обединетите нации во Њујорк, порача дека светот се соочува со брзи технолошки, економски и безбедносни промени, но дека меѓународниот поредок мора да продолжи да се темели на правила, соработка и заемна почит.

Мицкоски во говорот се осврна на иднината на генерациите кои денес растат во услови на брз развој на вештачката интелигенција, климатски промени, демографски промени и нови безбедносни предизвици.

„За мала земја како мојата, ова не е академско прашање. Ова е прашање на опстанок“, рече Мицкоски, посочувајќи дека малите држави немаат простор за големи геополитички грешки.

— реклама —

Тој порача дека Македонија има јасна стратешка ориентација.

View this post on Instagram

„Македонските граѓани знаат каде припаѓаат. Ние сме сојузник во НАТО. Соединетите Американски Држави се наш стратешки партнер. Полноправното членство во Европската Унија е наша стратешка определба“, истакна премиерот.

— реклама —

Според него, овие определби претставуваат една геополитичка ориентација заснована на демократијата, колективната безбедност, владеењето на правото и отворената економија.

Мицкоски се осврна и на европската интеграција, при што порача дека Македонија не бара полесен пат, туку процес во кој правилата и критериумите ќе важат еднакво за сите.

„Не бараме полесен пат. Бараме пат уреден со правила. Не бараме пониски стандарди. Бараме стандардите да останат стандарди“, рече тој.

Во говорот тој ја нагласи и потребата од реформи во земјата, посочувајќи дека Владата има одговорност да го зајакне владеењето на правото, да изгради поефикасни институции, поконкурентна економија и поголема доверба на граѓаните во сопствената држава.

— реклама —

Мицкоски говореше и за вештачката интелигенција, енергетиката, критичните суровини, дигиталната инфраструктура, миграцијата и климатските промени. Во тој контекст, тој ги истакна и коридорите VIII и X како дел од поширока европска визија за подобро поврзување на регионот со Европа.

Во завршницата од обраќањето, Мицкоски ја нагласи важноста на Обединетите нации и на меѓународниот поредок заснован на правила.

„Ние сме мала земја. Но, одбиваме големината на нашата територија да го одредува размерот на нашата амбиција“, порача тој.

— реклама —

Според Мицкоски, Македонија треба да биде држава на која сојузниците ќе можат да ѝ веруваат, во која младите ќе можат да ја планираат својата иднина и која ќе го брани сопствениот идентитет без да го негира идентитетот на другите.

„Нашата амбиција е да станеме сериозна држава“, истакна премиерот.

Тој обраќањето го заврши со порака дека идните генерации можеби нема да добијат свет без кризи и конфликти, но дека денешните лидери имаат одговорност да создадат свет во кој моќта нема да биде единствениот аргумент, технологијата ќе му служи на човештвото, а малите држави ќе имаат исто право на достоинство, правила и глас како и големите сили.