Премиерот Христијан Мицкоски изјави дека нема да поддржи уставни измени доколку не постојат јасни гаранции дека тие ќе бидат последниот услов на патот кон членство во Европската Унија и дека државата нема повторно да се соочи со нови билатерални и идентитетски барања.
„Додека сум јас претседател на Владата, никогаш нема да поддржам уставни измени во кои нема да имам јасен крај, дека ќе го почнеме процесот и ќе го завршиме. Додека немам јасни гаранции дека нема да има повеќе билатерални и идентитетски прашања, нема да поддржам такви измени“, истакна премиерот.
Тој потврди дека темата била отворена и на неговите средби со францускиот претседател Емануел Макрон и германскиот канцелар Фридрих Мерц, додавајќи дека очекува интензивирање на разговорите во периодот што следува.
Мицкоски нагласи дека Владата не бега од дијалог и е подготвена да бара решение, но нема да прифати дополнителни условувања кои би довеле до нови национални отстапки.
Премиерот се осврна и на односите со Бугарија, посочувајќи дека е непринципиелно да се зборува за почитување на човековите права, а истовремено да не се спроведуваат пресудите на Европскиот суд за човекови права поврзани со регистрацијата на организации на Македонците во Бугарија.
„Непринципиелно е, да се повикувате на почитување на човековите права, така кажа претседателот на Бугарија, а на бирото да ви стојат 14 пресуди од Судот за човекови права во Стразбур и да не дозволувате македонската заедница во Бугарија да регистрира невладина организација. И непринципиелно е да ги гледате луѓето во очи и да не ја говорите вистината. Тоа за мене е непринципиелно однесување. Или принципите важат за сите, или не важат. Тоа се темелните европски вредности“, рече Мицкоски.
Во обраќањето тој ја критикуваше и политиката на претходната власт, оценувајќи дека прифатила договори и обврски без да обезбеди доволни гаранции за македонските позиции.
„Петходната влада, којашто знаеме, полна со докази за криминал и корупција, којашто водеше политика и дипломатија на коленичење, многумина од европските лидери, коишто и тоа време биле сведоци, се чудат како сме го прифатиле. Ние и тогаш вели, се чудевме како вие го прифативте. Ние и тогаш им велевме, внимавајте што правите, тие одлучија да го прифатат.
Тој порача дека Владата ќе продолжи внимателно и трпеливо да ја спроведува својата стратегија за евроинтеграција.
„Полека, трпеливо, ќе оградиме патот, внимателно имаме план, имаме стратегија, под притисок нема да работиме. Ова се работи којшто се работат многу внимателно. Важно е дека многу почесто ќе бидеме во Брисел на масата и ќе можеме да зборуваме. Тоа е многу понапред од тоа што бевме пред година, две, три или претходно. Така што ја повикувам македонската јавност да не подлегнува на било какви притисоци коишто значат неизвесен крај, а дополнително национално понижување за граѓаните. За жал еден медиокритет каква штета може да направи, 1000 паметни за жал ќе им треба време да ја исправат таа штета“, додаде Мицкоски.
