Премиерот Христијан Мицкоски изјави дека државните институции ја презеле координацијата за справување со кризата со водоснабдувањето во Гостивар и најави дека приоритет е обезбедување техничка вода, а потоа и безбедна вода за пиење.
Одговарајќи на новинарско прашање за кризата во Гостивар, Мицкоски рече дека во текот на денот ќе се одржи седница на Управувачкиот комитет за кризни состојби, на која ќе бидат донесени дополнителни одлуки.
„Министерот за здравство денеска во 12:30 часот ќе има седница на Управувачкиот комитет за кризни состојби. Мислам дека ќе се донесат одлуки“, изјави Мицкоски.
Тој оцени дека државните институции ја презеле работата по, како што рече, „летаргијата“ на локалната самоуправа.
„Важно е сега, откако полека, но сигурно, работата се презема по летаргијата која ја имаше Општината, од страна на државните институции, да обезбедиме најпрвин техничка вода, а потоа и вода за пиење“, рече премиерот.
Во однос на истрагата за случајот, Мицкоски изјави дека Обвинителството веќе постапува и дека ќе има одговорност.
„Постапува Обвинителството. Сите оние кои се одговорни за ова ќе треба да бидат сослушани и, нормално, да се преземат мерки против истите. Веќе три лица се идентификувани како такви. Колку што знам, определени се мерки за обезбедување, така што институциите, како никогаш досега, во најбрзо време реагирале“, изјави Мицкоски.
