Мицкоски за Костадинов и негирањето на македонскиот јазик: „Не коментирам естрадни политичари“

Премиерот Христијан Мицкоски не сака да влегува во полемика со лидерот на бугарската партија „Преродба“, Костадин Костадинов, по неговата иницијатива македонскиот јазик да биде третиран како бугарски дијалект.

Прашан за најновиот потег на Костадинов, Мицкоски го нарече дел од „политичката естрада“ и оцени дека целта на ваквите изјави е токму да предизвикаат негова реакција.

— реклама —

„Јас не би сакал да коментирам вакви естрадни изјави од политичари кои припаѓаат на политичката естрада. Тоа е нивната цел – да предизвикаат моја реакција. Мислам дека не треба ни вие, новинарите, да им придавате значење на таков тип естрадни политичари“, рече Мицкоски.

Според него, вниманието треба да биде насочено кон европската интеграција на Македонија и надминувањето на блокадата на тој пат.

— реклама —

„Треба да се фокусираме на тоа што е наш интерес, а тоа е како да го одглавиме процесот и да станеме членка на ЕУ“, рече премиерот.

— реклама —

Реакцијата доаѓа откако Костадинов во бугарскиот парламент поднесе иницијатива со која бара македонскиот јазик да биде третиран како бугарски дијалект.

Костадинов и претходно јавно го оспорувал македонскиот јазик, тврдејќи дека станува збор за дијалект на бугарскиот и дека македонските говори се дел од бугарското јазично подрачје.

— реклама —

Неговата најнова иницијатива повторно го отвора едно од најчувствителните прашања во односите меѓу Скопје и Софија, во период кога спорот со Бугарија останува директно поврзан со натамошниот напредок на Македонија во процесот на европска интеграција.

Мицкоски, сепак, овојпат одлучи да не одговара на ставовите на Костадинов, оценувајќи дека нивната цел е да предизвикаат политичка реакција и дека фокусот треба да остане на деблокирањето на македонскиот пат кон Европската Унија.