Михаилова, која избега во Бугарија, тврди дека баба ѝ е киднапирана на граница – МВР: Разговаравме со неа два часа, по што влезе во Македонија

Министерството за внатрешни работи за „Скопје1“ потврди дека денеска, на граничниот премин Делчево, бил извршен службен разговор со бабата на Ива Михаилова, обвинета за сообраќајна несреќа со смртни последици, која избега во Бугарија. Од полицијата велат дека разговорот траел два часа и дека жената потоа непречено влегла во Македонија.

Одговорот на МВР следува по јавните обвинувања на Михаилова дека македонските служби незаконски ја задржале нејзината баба Илинка Кушовска, дека семејството со часови немало информации за нејзината местоположба и дека станува збор за „државен тероризам“.

„Постапувајќи по насоки на надлежен јавен обвинител, на граничниот премин Делчево, на 10.11.2026. во временскиот период од 11:20 до 13:20 часот, со наведеното лице е извршен службен разговор. По завршувањето на разговорот, лицето непречено остварило влез на територијата на РСМ“, одговорија од МВР за „Скопје1“.

— реклама —

Претходно, Михаилова, која избега во Бугарија, на социјалните мрежи објави дека нејзината баба е „незаконски киднапирана од службите на Република Северна Македонија“.

Таа тврдеше дека жената повеќе од седум часа била недостапна откако македонските власти ја запреле при влез од Бугарија, дека првично не одговарала на телефонските повици, а потоа телефонот ѝ бил исклучен.

— реклама —

„Последен пат разговарав со неа малку откако беше задржана на македонската граница кај Делчево; гласот ѝ трепереше од страв“, наведе Михаилова во објавата.

Таа посочи дека нејзината баба има речиси 70 години и дека е онколошки пациент, обвинувајќи ги службите за нехуман однос.

Според тврдењата на Михаилова, причината за постапувањето била намерата на македонските институции да добијат информации за неа, односно каде се наоѓа и што прави.

— реклама —

„Јас се наоѓам во болница во Софија и ако македонските служби толку многу сакаат информации за мене, можат директно да ме контактираат или да дојдат во Софија. Немам што да кријам“, напиша Михаилова.

Таа јавно го повика и министерот за внатрешни работи Панче Тошковски да објасни што се случувало, а наведе и дека бугарската амбасада била известена за случајот.

— реклама —

Во својата објава постапувањето го нарече „државен тероризам“ и побара итна реакција од бугарските власти.

Според официјалниот одговор на МВР, со жената бил извршен службен разговор по насоки на надлежен јавен обвинител, кој завршил во 13:20 часот, по што таа непречено влегла во земјата.

Од полицијата не соопштија за кои околности бил воден разговорот ниту дали тој бил поврзан со бегството на Михаилова.