Министерот Муцунски повика на политичка зрелост и поддршка за реформите што се директно поврзани со европската агенда

Министерот за надворешни работи и надворешна трговија, Тимчо Муцунски, на прес-конференција во Владата, порача дека членството во Европската Унија останува стратешка цел на државата и еден од клучните столбови на македонската надворешна политика.

На прес-конференција во Владата, Муцунски истакна дека европската интеграција бара сериозност, одговорност и национален консензус околу најважните државни прашања.

— реклама —

„Ова не е процес на една Влада. Ова не е процес на една политичка партија. Ова е процес што ја определува иднината на државата“, нагласи министерот.

— реклама —

Тој повика на политички дијалог заснован на аргументи, институции и заемна почит, оценувајќи дека европската интеграција не смее да биде предмет на дневнополитички конфронтации.

Муцунски упати повик и до опозицијата да покаже зрелост и конструктивност и активно да се вклучи во реформите поврзани со европската агенда и Планот за раст на ЕУ, особено во делот на Изборниот законик и правосудните закони.

— реклама —

„Не декларативна поддршка за Европа на прес-конференции, туку конкретна поддршка таму каде што навистина се носат одлуките – во институциите и во Собранието“, рече Муцунски.

Тој додаде дека Владата останува посветена на реформите, кои, според него, се важни не само за Брисел, туку и за подобри институции, правна сигурност и повеќе можности за граѓаните и младите.

Осврнувајќи се на Планот за раст на ЕУ, Муцунски најави дека во следниот период се очекува историски висока исплата на средства за државата во рамките на овој механизам.